معلومات عامة
٢٠ أغسطس ٢٠٢٠ ( 27 المشاهدات )
الإعلانات

عبده الشيطان بقصر بارون

#عبدة_الشيطان!¡
#قصر_البارون!¡

لما بتسمع كلمة (البارون) أول حاجة بتيجي في عقلك الجن والأشباح والعفاريت..
ولكني لما بسمع الاسم مبشوفش قدامي غير جملة واحدة: "عبدة الشيطان"..

الموضوع مرتبط بقصة غريبة ومريبة جدًا، قصة مرعبة، وبما إن ناس كتير منكم أعتقد مش هيبقوا عارفين القصة كاملة بحذافيرها، خلوني اخطفكم كام دقيقة وهرجعكم تاني، بس مش هترجعوا طبيعيين، لأنكم هترجعوا والذهول على وجوهكم.

-

علشان نعرف كل حاجة عن قصر (البارون)، لازم نعرف في البداية مين هو (البارون)، وازاي القصر ده اتبنى، انتقالًا للأحداث المريبة اللي حصلت فيه، لحد وقتنا هذا، وهنحلل مع بعض الموضوع المرعب ده وهنحاول نفهمه!

البارون (إدوارد إمبان)..
والبارون لقب أرستقراطي معناه المحارب، واللقب ده بيُقدَم للأشخاص اللي قدموا خدمات جليلة للوطن!
و(إدوارد) حصل على اللقب بجدارة، لأن في عصره كان صاحب المشروعات الكبيرة المنتشرة في أوروبا، فدولته كانت بتفتخر بيه، فأعطوه اللقب.

(البارون) كان راجل بيعشق السفر، رغم إن كان عنده إعاقه في رجله وكان بيعرج، بس لف العالم كله، وموطنه الأصلي بلجيكا..
بدأت رحلته من أفريقيا وغابات الأمازون لحد الهند، وأعجب جدًا بعادات وتقاليد الهند، وحبها، لأن الهند بتتمسك بعادات وتقاليد الماضي وبيفتخروا بيها..
وأكتر حاجة شدته وعجبته هي عادة موجودة عندهم اسمها عادة "الساتي"، واللقب ده بيطلقوه على الست اللي تصاحب زوجها لرحلة الأبدية زي ما كانت معاه في رحلته الدنيوية، ودي كانت بتتم بإن الست المتزوجة بعد وفاة زوجها بتلبس وتتعطر وكأنها في زفافها..
وعلى الرغم من اندهاش (البارون) من العادة، إلا إنه كان بيحب الهنود جدًا..
والسبب مش بس لأنه معجب بعاداتهم، كمان مرتبط بشيء حصل له..
إنه في يوم من الأيام أُصيب بمرض وكان هيموت لولا الهنود أنقذوه.

وبعد مدة طويلة عاش فيها (البارون) في الهند، قرر إنه يروح لدولة تانية، وكان اختياره المرة دي مختلف، فكر في دولة لها حضارة وتاريخ وتكون أفضل من الهند، وقتها ملقاش قدامه غير مصر، وده لأن تاريخ وحضارة مصر عظيمة لأبعد حد..
وفي الوقت ده مصر كانت لسه بتفتح قناة السويس، والعالم كله كان عاوز يزورها.

ومن أول لحظة دخل فيها (البارون) مصر وقع في حبها، لدرجة إنه قال إنه عاوز يعيش فيها ويموت فيها، وكمان يتدفن فيها..
وبعد ما قرر يعيش في مصر، كان لازم يبني قصر يقعد فيه، ومن هنا بدأ يدور على مكان استراتيجي مميز يليق بيه، لحد ما لقى هضبة مرتفعة في قلب العاصمة، وقرر يبني قصره فوقيها، الهضبة دي حاليًا هي هيليوبليس مصر الجديدة، والاسم ده بالمناسبة اسم فرعوني معناه مدينة الشمس.

وزي ما احنا عارفين إن (البارون) كان بيحب الهند، فقرر يبني قصره على الشكل الهندي، وبنى القصر سنة 1911م، وقتها كل الناس اللي كانت بتمر من جنبه كانوا بينبهروا من جماله وتصميمه وحجمه، وكمل (البارون) تحفته المعمارية بإنه جاب من كل دولة تحفة ثمينة وحطها في القصر، ومن أكثر التحف الغريبة اللي في قلب القصر، ساعة كانت بتظهر القمر حسب شكله، إذا كان بدر أو هلال، وكمان كانت بتعرف درجة الحرارة، والوقت بالدقايق والساعات والشهور والسنين، مع الأخذ في الاعتبار إن الساعة كانت في سنة 1911م، وفي الوقت ده الساعة كانت تحفة نادرة.

بعدين أضاف للقصر حاجات كتير غريبة، لوحات مرعبة علقها على جدرانه، وغرفة، ودي كانت أغرب حاجة في القصر..
غرفة اسمها الغرفة الوردية، أو غرفة المرايا، موجودة تحت القصر، الغرفة دي كل جدرانها مرايا من كل جهة، و(البارون) كان متعود دايمًا ينزل البدروم ويقعد فيها بالساعات، وماحدش كان عارف هو بيعمل إيه، وكان بيحذر إن ماحدش يقرب ناحية الغرفة دي غيره..
والغرفة كانت ممتدة تحت الأرض ومتوصلة بكنيسة اسمها كنيسة "البازاليك"، وبين الكنيسة والقصر 5 كيلو متر.

بعد ما أتم (البارون) بناء القصر، عمل احتفال ضخم جدًا في مصر وقتها، وعمل دعوة عامة لكل الناس من جميع الجنسيات، وفي الوقت ده كان العالم كله بيتردد على مصر، فكان المدعوين من كل مختلف البلاد، وطبعًا دعى سلطان مصر وقتها (حسين كامل)، اللي بعد ما زار القصر حس بغيرة وحقد على (البارون)، وده لأنه سلطان مصر ومبيمتلكش قصر زي ضيف جاي من بلد تانية!

بل إن الغيرة والحقد زادوا عند السلطان (حسين كامل) لما طلع فوق برج القصر، والبرج ده كان فيه ميزة عجيبة، طبعًا في السنة اللي بنتكلم فيها، البرج كان كل ساعة بيلف..
السلطان لما قعد في البرج، بدأ الطمع يسيطر عليه ويفكر في طريقة ياخد بيها القصر من (البارون)، واللي زود إصراره إنه كان قاعد في البرج وشايف القاهرة كلها قدامه، وده لأن (البارون) كان مختار مكان استراتيجي قوي.

من هنا بدأت الرسايل توصل للبارون من السلطان (حسين) إنه عاوز يشتري القصر..
الفكرة إن (البارون) كان خلاص قرر إن ده المكان اللي هيموت فيه، غير إنه صرف مبالغ مهولة على القصر، فكان الرفض قاطع..
في الوقت ده اتعرض (البارون) لمضايقات كتير من السلطان (حسين)، فقرر إنه يخرج من مصر ويرجع دولته بس ماحدش يدخل القصر في غيابه، وسابه من غير ما يبيعه، وقفله.

وبعد وفاة السلطان (حسين كامل)، رجع (البارون) لمصر وقعد تاني في قصره، وبدأ يستمتع بكل لحظة من غير مضايقات، وعاش (البارون) هو وعائلته في القصر، لحد ما جيه اليوم اللي اتعرفت فيه بنته (آن)، على بنت صديقة له اسمها (سيلفيا)..
(سيلفيا) بنت غريبة جدًا، لبسها غريب، راسمة وشوم غريبة، بتلبس إكسسوار غريب، وده كله كان لأنها كانت من عبدة الشيطان!

أول ما (سيلفيا) اتعرفت على (آن)، أهدتها هدية غريبة، كانت عبارة عن لوحة مرسوم عليها صليب مقلوب، ومن المعروف عن الصليب المقلوب إنه بيستخدموه عبدة الشيطان..
خدتها (آن) وعلقتها في غرفتها، ومن الوقت ده الكل بدأ يلاحظ على (آن) تغيرات في شخصيتها وشكلها وتعاملها معاهم، ومن الحاجات الغريبة اللي كانت بتعملها، إنها بتجتمع هي و(سيلفيا) وأصدقائها اللي من عبدة الشيطان، وكانوا مبيجتمعوش غير في البدروم، الغرفة الوردية اللي مصنوعة من المرايا وكان بيقعد فيها (البارون)، اللي أساسًا كان مانع إن أي شخص يدخلها.

ولما كانوا بيدخلوا الغرفة كانوا بيشغلوا أغاني بصوت عالي، ودخولهم البدروم كان دايمًا في وقت سفر (البارون)، لأن (آن) مكنتش تتجرأ تدخل الغرفة دي وقت وجود أبوها..
وكانوا بيدبحوا في الغرفة حيوانات وطيور وبالأخص الخفافيش.. وكانوا بيمسكوا الكتب الدينية ويدوسوا عليها برجليهم، أو يقرأوا الكلام بالمقلوب، والحاجات دي بيعملها عبدة الشيطان علشان يمجدوا شيطانهم، وكانوا بيتعاطوا المخدرات ويمارسوا العلاقات الشاذة والعلاقات الجنسية الجماعية!

بعدها بدأت الحاجات الغريبة تحصل ورا بعض، وبدأت حوادث قتل تحصل بكثرة، والعائلة عاشت في جحيم مستمر.

البداية كانت موت زوجة (البارون)، اللي ماتت في الأسانسير بطريقة غريبة، ركبته من البدروم، وهو طالع بيها وقف في النص فجأة وماتت، ولما شافوا الجثة كان الدم مغرق الأسانسير كأن حد قتلها..
بعدها مباشرة ماتت أخت (البارون)، وقعت من نافذة غرفتها على الأرض وماتت موتة بشعة..
وتوالت الحوادث المريعة بموت 6 خادمات بالقصر، كلهم ورا بعض بحوادث غريبة..
وحرفيًا ماكنش فيه استراحة، بعد الخادمات ماتت رئيسة الخدم، اللي لقوا جثتها داخل أسانسير المطبخ اللي بيودي الأكل من تحت لفوق، الغريب مش هنا، الغريب إنهم لما لقوا جثتها لقوا راسها مقطوعة!
بعدها على طول عثروا على جثة أخو (البارون) ميت في السرداب بطريقة مجهولة وغريبة!

في بعض الأحيان ماكنوش بيقدروا يحددوا سبب الوفاة، ودايمًا القاتل مجهول..
والغريب في الموضوع إن كل ما يموت شخص ويدوروا على (آن) يلاقوها بتحاول تنتحر ودايمًا ينقذوها ومتموتش، لحد ما بقى عندها 19 سنة وحاولت تنتحر.. ونجحت وماتت!

بعد كل الحوادث دي مبقاش موجود في القصر غير (البارون) وبنته الصغيرة اللي كان عندها شلل أطفال..
البنت بعد وفات أمها حالتها زادت سوء، وكان (البارون) بيعاملها بطريقة سيئة..
ومع الوقت بزيادة العُقد والوحدة والقسوة اللي أبوها بيعاملها بيها، أُصيبت بمرض نفسي غريب، حتى الأطباء نفسهم معرفوش يحللوا مرضها، وماكنش له علاج، وبسبب المرض ده كانت بتقعد تبكي بالساعات بدون أي سبب، وتصرخ صراخ هيستيري، وماكنش الصراخ ده بيقف غير لو دخلت الغرفة الوردية اللي في البدروم، وبعد ما تطلع من الغرفة كانت بتقول كلمات غريبة جدًا لأي شخص تقابله:
"صديقي الوفي داخل الغرفة، كلمني وطمني عليك."

وبعد فترة قصيرة لقوها مقتولة، ومرمية داخل بئر، ولما طلعوا جثتها كان وجهها يخوف، الرعب كان مرسوم على ملامحها كأنها شايفة شيء غريب!

(البارون) تحولت حياته لجحيم، بقى وحيد في قصر كبير ومريب ملطخ بدم عائلته..
أُصيب بمرض نفسي، وكان كل فترة والتانية تجيله نوبات صرع، وكان بيقع على الأرض ويتشنج، وأحيانًا كان بيتبول على نفسه..
ولما زاد الأمر سوء، سافر بلجيكا علشان يتعالج، ولكنه اتوفى هناك سنة 1922م، وخدوا جثمانه من بلجيكا ورجعوه مصر حسب وصيته إنه يتدفن فيها، وفعلًا اتدفن في مصر.

ومن وقت موته لحد من قريب جدًا القصر فضل مهجور، ماحدش دخله ولا قرب منه..
حتى الحديقة اللي كان عاملها (البارون) في الوقت ده، ومجمع النباتات من جميع دول العالم وزارعها في القصر، تحولت لخرائب..
ومن فترة قليلة بدأت الحكومة في مصر ومسؤلين السياحة في ترميم القصر، وبالفعل تم ترميمه وهيكون مكان أثري للزوار يقدروا يدخلوه، والصورة الأخيرة في البوست للقصر بعد الترميم.. أما عن اللي ممكن يحصل فيه لو دخلناه، الله أعلم.

وطبعًا لأن المكان مهجور من زمن بعيد، طلعت عنه إشاعات إنه مسكون بالجن والشياطين، والأشخاص اللي ساكنين جنب القصر كانوا بيقولوا إنهم بيسمعوا أصوات خارجة منه، وبيشوفوا حاجات غريبة فيه رغم إنه مقفول من زمن طويل.

وآخر حاجة غريبة حصلت كانت سنة 1982م، بعد وفاة (البارون) بـ60 سنة، ناس شافوا دخان بيطلع من الغرفة الرئيسية بالقصر، وانتقل الدخان لغرفة البرج، وبعدين تحول الدخان لنار مهولة وبدأ القصر في الاشتعال، هنا الناس اتصلت بالشرطة وقالتلهم إن القصر بيحترق، ولكن فجأة انتهى كل شيء، ورجع القصر لوضعه الطبيعي من غير دخان ولا نار.. المشكلة إن مش شخص أو اتنين اللي شافوا الواقعة دي، بل معظم سكان المكان!

أما عن الأقاويل اللي بتتقال عنه:
فيه ناس بتقول إن الأشباح ساكنة القصر، خصوصًا إن ناس كتير ماتت فيه، ومن الأشباح اللي متأكدين إنه موجود في القصر هو شبح زوجة (البارون)، اللي بيقولوا إن وقت موتها في الأسانسير كانت بتطلب المساعدة من (البارون) ولكنه رفض المساعدة، وأغرب حاجة في الموضوع إن (البارون) دفنها في مكان بعيد في الصحرا، مكان مجهول ماحدش يعرف عنه حاجة، مدفنهاش في مدافن العائلة زي باقي الجثث!

وفيه أقاويل بتقول إن الشبح اللي متأكدين إنه موجود في القصر، هو شبح المصمم اللي صمم القصر (أليكساندر مارسيل)، وبيقولوا إن (البارون) في الوقت ده قتله علشان ميصممش قصر شبهه لشخص تاني!

طبعًا كل الأسباب دي وبرضه معاهم حالات القتل بالقصر، بغض النظر عن الطقوس الشيطانية اللي كانت بتقوم بيها (آن) وأصدقائها، كفيلة تخلينا نفكر كتير..
هل القصر فعلًا مسكون وفيه جن وأشباح؟
ولا كلها أقاويل!
ولو كانت أقاويل، إيه اللي كان بيحصل وقت وجود (البارون) في القصر اتسبب في قتل عائلته كلها؟!

البوست إعادة نشر.

-

- لو وصلت لحد هنا لازم تعرف إن المقال ده مش الوحيد اللي موجود على البيدج، ولو رجعت لورا هتلاقي مقالات تانية كتير.
ولو مهتم بالمقالات الغريبة دوس لايك للبيدج وتابع.
ويا ريت لما تخلص قراءة متبخلش بالشير والمنشن لأصحابك يقرأوا معاك علشان يستفيدوا❤

وده لينك الأكونت الرسمي بتاعي لو مش موجود عليه:
https://www.facebook.com/Mohamed.Sawy93

ولو مهتم تكون موجود في بيت العيلة والجروب الخاص بينا كلنا اللي ممكن تنشر فيه أي حاجة تخصني براحتك ده اللينك انضم: https://www.facebook.com/groups/2377411919031522

ولو ليك في الإنستجرام علشان هيبقى فيه شغل عليه الفترة الجاية ده اللينك: https://instagram.com/mohamed_sawy16?igshid=w18h6y9ej979

ولو بتحب تويتر ده اللينك بتاعي برضه شغال عليه: https://mobile.twitter.com/Mohamed10975091

ومتنساش تشوف أول كومنت.

الشير متاح، ولكن ممنوع الكوبي بيست، ربنا عالم المقال تعبني قد إيه علشان اجمع المعلومات واربطها ببعض وانسقها بالشكل ده، فيا ريت متبخلش بالشير ومتأذنيش بالكوبي واعطي كل ذي حقٍ حقه.

#مقالات_محمد_صاوي!¡
#محمد_صاوي!¡

ينصح بمشاهدتها

الإعلانات

قد يعجبك ايضاً

أين توجد عصا موسى عليه السلام افتار الفيسبوك ماشطة بنت فرعون أطلانتس الضائعة واللغز المحير