معلومات عامة
٢٠ أغسطس ٢٠٢٠ ( 26 المشاهدات )
الإعلانات

الجاثوم شلل الاطفال

#الجاثوم!¡
#شلل_النوم!¡
#زيارة_من_الشيطان!¡

يومين مبنامش، ده وقت كبير قوي، كان لازم افهم إن ده اللي هيحصل، رجعت من بره، مرهق، تعبان، مش حاسس بنفسي، كل اللي بفكر فيه السرير، محتاج انام، أفصل عن الدنيا كلها، استريح.
دخلت أوضتي بهدومي، ورميت نفسي على السرير من غير حتى ما أقلع الجزمة، الدنيا كانت بتلف بيا، لحظات وكنت في عالم تاني، أخيرًا نمت، فات وقت مش عارف قد إيه، غالبًا ساعة، كنت خلاص غرقت في النوم، لقيت حد دخل أوضتي وضربني بالقلم، صحيت من النوم مفزوع، روحي اتسحبت من جسمي، خدت نفسي بصعوبة، بعد ما فتحت عيني وملقتش حد موجود، أنا أصلًا لوحدي في الشقة، مين اللي ضربني؟!

حاولت اتماسك، ولكن التعب والإرهاق اللي أنا فيه غلبني ونمت تاني، دقايق ولقيت نفس القلم نزل على وشي، ولكن المرة دي اللي حصل كان مرعب، لما فتحت عيني حسيت بشلل، جسمي كله مبيتحركش، مش قادر انطق أو اتكلم، أنا بموت، حاولت اجاهد علشان احرك إيدي مفيش، روحي بتخرج، مفيش غير عيني هي اللي بتتحرك، كاشفة أوضتي، ولكن الرؤية مش واضحة، حاولت احركها يمين وشمال، لقيته واقف، شكله مرعب، كيان إسود، ملامحه ماكنتش باينة، واقف بيبص لي، اترعبت، كنت هموت، قلبي اتقبض، غمضت عيني، وفتحتها، لحسن حظي كل حاجة رجعت طبيعية، اتحركت براحة، خرجت من أوضتي، لقيت الشقة فاضية، هنا بس قدرت اخد نفس الحياة بعد ما شوفت الموت!

ازيك، أنا الكاتب محمد صاوي، فاكرني؟! أنا صاحب المقالات الكتير اللي بتدخل تقرأها على البروفايل، اللي قرأته فوق ده مش فيلم رعب، دي حقيقة، حصلت لي شخصيًا، موقف مر عليا وشوفت فيه الموت، حبيت افتح بيه المقال، وكالعادة، هكلمك عن موضوع غريب جدًا، بيحصل لنسبة كبيرة جدًا من البشر، وارد جدًا يكون حصل لك، لو افتكرته، تمالك أعصابك، وتعالى معايا أعرفك إيه ده، ومتقلقش يا صديقي، ده شيء طبيعي وله أسباب علمية، وملوش علاقة بالأشباح، رغم إنه ممكن يتسبب في إنك تحس برعب الدنيا كله، وممكن تعتقد إنه زيارة من الشيطان، ولكنه له أسباب علمية كتير.

جاهز للرحلة الجديدة؟! مشروبك المفضل، فضي عقلك، ركز، هسرقك من الدنيا كام دقيقة وهرجعك تاني. يلا بينا.

-

الجاثوم، أو شلل النوم، شيء بيحصل لناس كتير أثناء نومهم، بيستمر دقايق أو ثواني، الشخص بيكون شايف وواعي للي حواليه ولكنه مش قادر يتحرك أو يتكلم، وبيحصل له هلوسة، بيسمع أصوات غريبة، بيشوف حاجات مرعبة، وممكن شيء يلمسه، وبيحس بخوف مهول كأن قلبه هينفجر.
الحالة دي ممكن تحصل لك مرة واحدة أو مرات كتير في عمرك.

كل الناس اللي اتخلقت في الدنيا معرضين للجاثوم، سواء كانوا أصحاء أو عندهم خلل نفسي معين، وأحيانًا الحالة دي بيتم توارثها للأبناء نتيجة تغيرات بتحصل.

بعض العلماء قالوا إن سبب شلل النوم أو الجاثوم قلة النوم، أو التوتر، أو النوم الكتير بصفة غير منتظمة، وأحيانًا بيكون السبب خلل في نوم حركة العين السريعة، يعني عينك مبتنامش بشكل طبيعي وبدل ما تنغمس في الحلم بتسيب جسمك جوه، وتصحى هي بهلوسة غريبة، وده بيسبب لك رعب فظيع.

الجاثوم ملوش علاج، والعلماء مش شايفين إنه محتاج علاج نفسي، هو شيء طبيعي، ممكن يحصل لكل الأفراد، ومش خطير نهائي، وممكن ينتهي بسهولة من خلال النوم الطبيعي والصحي.

لو إنتَ شايف نفسك الوحيد اللي بيتعرض للجاثوم، أو مرعوب وحاسس إن عندك مس، أو فيه شيطان بيزورك بالليل، عاوز أقولك إن نسبة البشر اللي اتعرضوا للجاثوم مرة واحدة في حياتهم تتراوح ما بين 8% لـ50% من سكان الكوكب، و5% بيتعرضوا له بشكل مستمر، لدرجة إن فيه ناس ألفت عنه كتب وحكايات كتير، وكان من ضمنهم ناس ربطوا بينه وبين الاختطاف من الكائنات الفضائية، الموضوع رغم إنه طبيعي وبيحصل لكل الناس إلا إن فيه بعض الناس ربطته بالخرافات!

مؤخرًا فيه بعض العلماء اكتشفوا بعض الأسرار عن الجاثوم، ووصفوه بطريقة علمية، وده بعد اكتشافهم لمراحل النوم المختلفة، ومعرفة كل التغيرات الحيوية اللي لها علاقة بكل مرحلة منها.
بعد 90 دقيقة من نومك، بتبدأ تدخل في مرحلة اسمها النوم الحالم، ودي المرحلة اللي بتبدأ تحلم فيها، ودي بيحصل فيها ارتخاء كامل لعضلات جسمك كلها، إلا عضلة الحجاب الحاجز وعضلات العين الخارجية، بيكونوا لسه مدخلوش المرحلة الكاملة من الارتخاء، وفي الوقت ده، وإنتَ بتحلم، ممكن يحصل لك الجاثوم، وقتها بيكون جفن عينك وعينيك فقط همَ اللي بيتحركوا، وجسمك ما زال نايم، وممكن بكل سهولة يحصل خلل يسبب في حدوث الجاثوم.
وده بيحصل لما تخرج من مرحلة النوم الحالم، لمرحلة النوم غير الحالم، وفجأة تصحى من النوم، ولكن في الوقت ده لسه جسمك عنده الارتخاء الكامل للعضلات، فبيصعُب عليه الحركة، وهنا بتبدأ تحس برعب مهول بيعصف بيك، لأنك بتبدأ تشوف حاجات غريبة، قطة، كلب، كيان معين، وتسمع أصوات غريبة، وممكن كمان تحس إن فيه شيطان قاعد على صدرك، بيخنقك، بياخد نفسك، وقتها بتحس بالعجز، ومش قادر تتحرك، ولا تتكلم، وممكن يستمر معاك الوضع بضع ثواني أو دقايق!
بينتهي شلل النوم أول ما تقدر تتحرك وتتكلم، وبتصحى من النوم حاسس بخوف شديد جدًا، وممكن تبكي من الرعب، وبتحس كأنك كنت بتموت.

3 أشخاص من كل 10 بيُصابوا بالجاثوم، وبتبدأ معاهم غالبًا في سن المراهقة، وفي الغالب بيحصل للرجالة والسيدات من جميع الأعمار.
ولو حصل وأصاب أكتر من فرد في أسرة واحدة ده بيكون طبيعي جدًا، وممكن كمان يبقى بصورة مستمرة، لأن فيه أبحاث بتؤكد إنه من الممكن يكون له علاقة بالجينات الوراثية.

لو مبتنامش كويس وبتسهر إنتَ مُعرض للجاثوم، وده من أهم الأسباب له، لأنك في الوقت ده بيحصل لك ارتخاء شديد في العضلات قبل أصلًا ما تنام.
لو بتقلق وبتتوتر كتير، أو بتنام على ضهرك كتير، أو عندك مرض نفسي معين، زي اضطراب القطب الثنائي، في الحالة دي إنتَ معرض بكل سهولة للجاثوم.

دراسة علمية أكدت إنه من الممكن يكون الجاثوم عرض من أعراض النوم القهري "Narcolepsy"، ولو عندك الحالة دي إنتَ معرض كمان لنوبات نوم فجائية، وآلام العضلات والارتخاء الزائد فيها.

الجاثوم علميًا حالة مؤقتة بتصيب الجسم بالشلل بعد الاستيقاظ من النوم مباشرة واسمه العلمي "Hypnopompic paralaysis"، وممكن تحصل لك قبل ما تنام مباشرة وهنا اسمه "Hypnagogic paralysis".

وقت النوم، بتدخل في وضعية اسمها "Rem"، ودي بتكون حركة العين فيها سريعة، وبتُصاب بالشلل، وده ممكن يسبب لك جاثوم.
في الطبيعي لما بتيجي تنام بتمر بـ3 مراحل، جسمك بينام، بعدين عقلك بيتطمن على جسمك إنه نام، بعدين عقلك بينام، وده لأن لو عقلك نام قبل جسمك وحلمت إنك بتنط من شباك ممكن جسمك يقوم وإنتَ نايم يفتح الشباك وينط، علشان كده لازم جسمك يتشل شلل كامل، في الحالة دي لو عينك صحيت دون قصد، وإنتَ في قلب حلم، هيحصل لك جاثوم، لأن جسمك مشلول، وبتبدأ تشوف هلوسة، وتسمع أصوات، وممكن تحس بلمس كمان، لدرجة إنك بتعتقد إنك لسه بتحلم، وده بيزيد من الهلوسة!

شلل النوم مش مرض، هو ظاهرة بتحصل لكل الناس، ومفيش سبب علمي مثلًا يؤكد إنه بيسبب الوفاة، ومفيش دليل علمي واحد على خطورته، هو ظاهرة من ظواهر النوم المعروفة، لأنك في حالة الجاثوم عضلة الحجاب الحاجز بتكون مستقرة، والتنفس بتاعك مستقر، والأكسجين في الدم مبيقلش.

الجاثوم ملوش علاج، لأنه مش مرض في الأساس، ولكنه محتاج استقرار نفسي، ممكن اللي بيحصل له كتير يكون متوتر دايمًا وخايف من النوم، وهنا بيحتاج تدخل طبيب نفسي، ولكنه في النهاية مفيهوش أي خطورة.

الأسباب الطبيعية لشلل النوم مش معروفة فسيولوجيًا، ولكن بعض العلماء قالوا إنها ممكن تكون مرتبطة بكبت الخلايا العصبية الحركية في جسر فارول في الدماغ خصوصًا لو مستوى الميلاتونين منخفض، وده بيؤدي للشلل الجسدي، وده بيحصل لك وقت النوم علشان متتحركش وتتفاعل مع الحلم وتأذي نفسك.
والدراسات بتشير إن ناس كتير جدًا اتعرضت للجاثوم مرة أو مرتين في حياتهم، ومن أسبابه النوم على الضهر، انقطاع النفس وقت نومك، عدم انتظام مواعيد النوم، نقص الأكسجين عن المخ، ضغوطات زيادة، العقاقير المنومة، استخدام عقاقير الهلوسة، تغيير طارئ في حياتك، وممكن كمان يكون وراثي.

في النهاية الجاثوم أو شلل النوم عرض طبيعي بيحصل لمعظم الناس، وبينتج عن التوتر والأرق وقلة النوم، وسهل جدًا التخلص منه بالراحة النفسية وممارسة الرياضة وحل مشكلات الحياة، بالراحة النفسية كل شيء مقلق بينتهي يا صديقي.

وآخرًا لو اتعرضت للجاثوم، ما عليك إلا إنك تستسلم، ومتقاومش، لأن المقاومة هتزود عذابك، حاول تسترخي، وحرك صوابع رجلك بهدوء، وغمض عينك وفتحهم كذا مرة، ده هيساعدك على الاستيقاظ من النوم والتخلص من الجاثوم بكل سهولة.

للأسف رحلة النهارده خلصت يا صديقي، اتمنى تكون عجبتك، الوقت اللي بنكون فيه مع بعض قليل جدًا، واتمنى من كل قلبي يكون مفيد، متنساش تدعمني لو المقال عجبك، شير ولايك وعرف الناس على البروفايل بتاعي.
كان معاك الكاتب محمد صاوي، اشوفك الرحلة الجاية.

المصادر:
https://www.scientificamerican.com/article/ask-the-brains-sleep-paralysis/

https://ar.m.wikipedia.org/wiki/%D8%B4%D9%84%D9%84_%D8%A7%D9%84%D9%86%D9%88%D9%85

-

- لو وصلت لحد هنا يبقى المقال انتهى، ولو مهتم بالمقالات الغريبة والمثيرة للاهتمام، تابعني واعمل (شاهد أولًا)، بنزل مقال شبه يومي باستمرار.
وادخل البروفايل هتلاقي مقالات كتير جدًا ممكن تقرأها براحتك.
ويا ريت متنساش الشير والتفاعل مع المقال لو حابب إني استمر كدعم ليا، وكمان اعمل منشن لصديق ليك بتحبه يقرأ معاك ورشحه يعمل فولو للبروفايل❤

ولو مهتم بمحتوى مختلف بينزل بشكل شبه يومي على البيدج بتاعتي اعملها لايك وده اللينك بتاعها: https://www.facebook.com/Mohamed.sawy99

ولو مهتم تكون موجود في بيت العيلة والجروب الخاص بينا كلنا اللي ممكن تنشر فيه أي حاجة تخصني براحتك ده اللينك انضم: https://www.facebook.com/groups/2377411919031522

ولو ليك في الإنستجرام علشان هيبقى فيه شغل عليه الفترة الجاية ده اللينك: https://instagram.com/mohamed_sawy16?igshid=w18h6y9ej979

ولو بتحب تويتر ده اللينك بتاعي برضه شغال عليه: https://mobile.twitter.com/Mohamed10975091

الشير متاح، ولكن ممنوع الكوبي بيست، لأني بتعب جدًا في المقالات اللي بكتبها، فيا ريت متبخلش بالشير ومتأذنيش بالكوبي بيست.

مهم تشوفوا أول كومنت❤👇

#مقالات_محمد_صاوي!¡
#محمد_صاوي!¡

ينصح بمشاهدتها

الإعلانات

قد يعجبك ايضاً

الآثار الجانبية لدواء كلافوكس و موانع استعمال كلافوكس حبوب فيروجلوبين للشعر عالم حواء أين يقع وادي شعيب مضاد حيوي للاسنان كلافوكس